डडेल्धुरा । यू-१९ एकदिवसीय राष्ट्रिय क्रिकेट प्रतियोगिताको सुदूरपश्चिम छनोटमा समूह बी का खेलहरू आजदेखि सुरु भएका छन्। उक्त समूहको पहिलो खेलमा आज अछामले बझाङलाई ९८ रनले हरायो । जितका लागि पाएको १६४ रनको लक्ष्य पछ्याएको बझाङ २३ ओभर १ बलमा ६५ रनमा समेटियो ।
उसका पारस रोकायाले २४ रन बनाउनुबाहेक अन्यले सम्झनलायक प्रदर्शन गर्न सकेनन् । अछामका लागि युवराज खत्री एक्लैले ६ विकेट चट्काए । म्यान अफ द म्याच समेत भएका युवराजले ४।१ ओभर बलिङ गर्दै २ मेडन राखेर २ रन मात्रै खर्चिएर ६ विकेट हात पारेका हुन् ।
त्यसअघि परशुराम नगरपालिका १२ स्थित जोगबुढा रंग मैदानमा पहिला ब्याटिङ गरेको अछामले ३८ ओभर ३ बलमा १६३ रनमा सबै विकेट गुमाएको थियो । जसमा आषिश लुहारले ४३, युवराज खत्रीले ३७,रविन भण्डारीले ३४ रनको योगदान गरे ।
प्रतियोगिताअन्तरगत आज कैलाली र अछाम भिड्ने स्कोरर लोकेश जोशीले जानकारी दिए । समूह बी बाट शिर्ष स्थानमा पुग्ने टोली फाइनलमा बैतडीसंग भिड्नेछ ।
