अछाम। अछामको पञ्चदेवल विनायक नगरपालिका–८ सेलापानीमा महिनवारीका कारण छाउ बार्न त्रिपालमुनि सुतेकी महिलामाथि ढुङ्गा खस्दा दुई जनाको मृत्यु भएको छ।

जिल्ला प्रहरी कार्यालय अछामका अनुसार आज (शुक्रबार) बिहान साढे ५ बजे खेतबारीमा टाँगिएको त्रिपालमुनि सुतिरहेको अवस्थामा माथिबाट खसेको ढुङ्गाले ३५ वर्षीया निम खनाल र स्थानीय गोरे भण्डारीकी ७ वर्षीया छोरी कविता भण्डारीको घटनास्थलमै मृत्यु भएको हो।

मृतक कविताकी आमा ३६ वर्षीया रत्ना भण्डारी गम्भीर घाइते भएकी छन्। उनको टाउकोमा चोट लागेकाले प्राथमिक उपचारपछि स्वास्थ्य चौकी बारलामा पठाइएको प्रहरीले जनाएको छ।

डीएसपी ओमप्रकाश खनालका अनुसार रत्ना भण्डारी र निम खनाल महिनवारी बार्न त्रिपालमुनि बसेका थिए। उनीहरूसँगै सुतेकी बालिका कविताको पनि ढुङ्गा लागेर ज्यान गएको हो।

घटनास्थलमा आवश्यक अनुसन्धान तथा कानुनी प्रक्रिया अघि बढाउन प्रहरी निरीक्षक टेकबहादुर देउवाको कमाण्डमा प्रहरी टोली खटिएको जिल्ला प्रहरीले जानकारी दिएको छ।