डडेल्धुरा ।  नेपाल प्रेस युनियनको ३४औं स्थापना दिवसको अवसरमा प्रेस युनियन डडेल्धुरा शाखाले मंगलबार डडेल्धुरा अस्पतालमा फलफूल वितरण गर्दै साताव्यापी कार्यक्रमको शुभारम्भ गरेको छ। कार्यक्रम अन्तर्गत ३८ जना बिरामीहरूलाई फलफूल वितरण गरिएको हो।

‘भौतिक र पेशागत सुरक्षा सहित पत्रकारको सम्मानजनक पहिचान’ भन्ने नारासहित सुरु गरिएको अभियानमा डडेल्धुरा अस्पतालका मेडिकल सुपरिटेन्डेन्ट डा. नरेन्द्र खनाल, प्रेस युनियनका पदाधिकारी तथा स्वास्थ्यकर्मीहरूको उपस्थिति थियो।

प्रेस युनियन डडेल्धुरा शाखा अध्यक्ष योगेन्द्र रावलले स्थापना दिवसको अवसरमा दिपप्रज्वलन, रक्तदान, स्वास्थ्य परीक्षण, अन्तरक्रिया लगायतका कार्यक्रम समावेश गरिएको जानकारी दिए।

उनका अनुसार देशभर प्रेस युनियनले सामाजिक उत्तरदायित्व वहन गर्ने उद्देश्यले विभिन्न जनकल्याणकारी गतिविधि सञ्चालन गरिरहेको छ।