धनगढी । कैलालीकाे  धनगढी उपमहानगरपालिका अन्तर्गतका २८ सामुदायिक विद्यालयमा विद्यालयस्तरीय भूकम्पीय सुरक्षा, पूर्वतयारी र घरायसी आगलागीसम्बन्धी कृत्रिम (नमुना) अभ्यास कार्यक्रम सम्पन्न भएको छ।

उपमहानगरपालिका भित्र सम्भावित विपद्‌हरूको पूर्वतयारी र प्रभावकारी प्रतिकार्यका लागि समन्वयकारी क्षमता विकास गर्ने उद्देश्यसहित उपमहानगरका १९ वटै वडामा रहेका २८ विद्यालयमा एक-एक दिनको नमूना अभ्यास कार्यक्रम सञ्चालन गरिएको हो।

कार्यक्रममा धनगढी उपमहानगरपालिकाको विपद् व्यवस्थापन शाखा, नगर प्रहरी, २८ वटै विद्यालयका शिक्षक–शिक्षिका, विद्यार्थी, सरोकारवाला निकायहरू र क्षेत्रगत जनशक्ति सहभागी थिए। अभ्यासमा विपद् पूर्व, दौरान र पश्चात गरिने कार्यहरू समेटिएको थियो।

धनगढी उपमहानगरपालिकाका विपद् सम्पर्क व्यक्ति दीपक भण्डारीका अनुसार, यस्तो अभ्यासले आपतकालीन अवस्थाको व्यवस्थापन, समन्वय र क्षति न्यूनीकरणमा विद्यालयस्तरका स्वयंसेवक विद्यार्थीहरूको भूमिका सशक्त बनाउने विश्वास गरिएको छ।

कार्यक्रम धनगढी उपमहानगरपालिकाको आयोजना, युरोपेली आयोगको आर्थिक सहयोग तथा युएनडीपी नेपाल, युनिसेफ नेपाल, युएन वुमन, हेन्डीक्याप इन्टरनेसनलको प्राविधिक साथमा, स्थानीय साझेदार संस्था रुडुक नेपाल र नेपाल रेडक्रस सोसाइटी कैलाली शाखाको सहकार्यमा सञ्चालित शहरी विपद् तथा भूकम्पीय पूर्वतयारी SUPER-II परियोजना अन्तर्गत सम्पन्न भएको हो।

कार्यक्रममा सहभागी वडा अध्यक्षहरूले आगामी दिनमा विपद् प्रतिकार्यका लागि प्रविधि तथा मानव संसाधनको समुचित परिचालन, सरोकारवाला निकायहरूबीच प्रभावकारी समन्वय तथा विद्यालय र समुदायस्तरमै सचेतनामूलक र अभ्यासमूलक गतिविधि नियमित रूपमा सञ्चालन गर्नुपर्ने धारणा व्यक्त गरे।