डडेल्धुरा । डडेल्धुरामा रहेका सात वटा स्थानीय तहमध्ये अजयमेरु गाउँपालिकाले सबैभन्दा बढी अंक ल्याएर ‘स्थानीय सरकार संस्थागत क्षमता स्वमूल्यांकन (लिजा)’ मा पहिलो स्थान हासिल गरेको छ।

आर्थिक वर्ष २०८०/८१ का लागि गरिएको मूल्यांकनमा अजयमेरुले ८३.२५ प्रतिशत अंक ल्याएर जिल्ला स्तरमै अग्रस्थानमा आउन सफल भएको हो। संघीय मामिला तथा सामान्य प्रशासन मन्त्रालयले शुक्रबार सार्वजनिक गरेको अन्तिम नतिजामा अजयमेरु शीर्ष स्थानमा रहेको उल्लेख छ।

त्यसैगरी, आलिताल गाउँपालिका र भागेश्वर गाउँपालिकाले समान ८१.२५ अंक ल्याएर संयुक्तरूपमा दोस्रो स्थान पाएका छन्। गन्यापधुरा गाउँपालिका ७५.५० अंकसहित तेस्रो स्थानमा रह्यो।

अन्य स्थानीय तहहरूमध्ये परशुराम नगरपालिका (७५.२५), अमरगढी नगरपालिका (७३.७५) र नवदुर्गा गाउँपालिका (७३.२५) क्रमशः पछिल्ला स्थानमा रहेका छन्।

मन्त्रालयले स्थानीय सरकार सञ्चालन ऐन २०७४ को दफा ८० अनुसार वार्षिक रूपमा लिजा मूल्यांकन गर्दै आएको छ। यस प्रक्रियाले स्थानीय तहको कार्यसम्पादन, सबल–दुर्बल पक्ष, सुशासन, सेवा प्रवाह, न्यायिक कार्यसम्पादन, बजेट व्यवस्थापन, सामाजिक समावेशीकरणलगायत सूचकका आधारमा स्थानीय तहलाई तुलनात्मक रूपमा सक्षम र प्रभावकारी बनाउन योगदान गर्ने उद्देश्य लिएको छ।