डडेल्धुरा । संघीय मामिला तथा सामान्य प्रशासन मन्त्रालयले आर्थिक वर्ष २०८०/८१ का लागि स्थानीय तहहरूको संस्थागत क्षमता स्वमूल्याङ्कन (लिजा) नतिजा सार्वजनिक गरेको छ । मन्त्रालयले प्रकाशित गरेको नतिजामा सुदूरपश्चिमका विभिन्न जिल्लाका स्थानीय तहहरूको कार्यसम्पादनको स्थिति प्रस्ट भएको छ ।

कैलालीमा घोडाघोडी नगरपालिका ८५.५० अङ्कसहित प्रदेशमै उत्कृष्ट ठहर भएको छ भने मोहन्याल गाउँपालिका ५५.५० अङ्कसहित जिल्लामा पुछारमा परेको छ । यसै जिल्लामा धनगढी उपमहानगरपालिका ८४, गोदावरी नगरपालिका ८१, चुरे गाउँपालिका ८१, बर्दगोरिया गाउँपालिका ७९.२५, जानकी गाउँपालिका ७७.७५, गौरीगंगा नगरपालिका ७५.७५, भजनी नगरपालिका ७१.७५, कैलारी गाउँपालिका ७१.२५, जोशीपुर र टीकापुर दुवैले ७०.२५, र लम्की चुहा नगरपालिका ६५ अङ्कमा सीमित भएका छन् ।

कञ्चनपुरमा बेदकोट नगरपालिका ८३.२५ अङ्कसहित पहिलो बनेको छ भने दोधारा चाँदनी नगरपालिका ७१.५० अङ्कमा पुछारमा परेको छ । अन्य स्थानीय तहमध्ये बेलौरी ८२.५०, लालझाडी र बेलडाँडी ८१.७५, भीमदत्त ८१.२५, पुनर्वास ८१, शुक्लाफाँटा ८० र कृष्णपुर नगरपालिका ७३.२५ अङ्कमा रहेका छन् ।

बाजुरामा बुढीगंगा नगरपालिका ८४.२५ अङ्कसहित उत्कृष्ट बनेको छ भने बुढीनन्दा नगरपालिका ६१.७५ अङ्कमा पुछारमा छ । बडीमालिका नगरपालिका ८३.५०, जगन्नाथ गाउँपालिका ८१.५०, स्वामिकार्तिक खापर ८१, हिमाली ७५.५०, त्रिवेणी ७४.७५, खप्तड छेडेदह ७३.५० र गौमुल ६९.५० अङ्कमा छन् ।

बैतडीमा पुर्चौंडी नगरपालिका ७७.२५ अङ्कसहित पहिलो बनेको छ भने मेलौली नगरपालिका ३१.२५ अङ्कमा पुछारमा छ । अन्य स्थानीय तहहरूमा दोगडाकेदार गाउँपालिका ७६, सुर्नया ७४.७५, दशरथचन्द नगरपालिका ७४.५०, शिवनाथ गाउँपालिका ७४.२५, सिगास गाउँपालिका ६४.५०, डिलाशैनी ६१.५०, पाटन नगरपालिका ५६.५० र पञ्चेश्वर गाउँपालिका ५६ अङ्कमा छन् ।

अछाममा पंचदेवल विनायक नगरपालिका ७७.५० अङ्कसहित पहिलो र ढकारी गाउँपालिका ४३.७५ अङ्कसहित पुछारमा परेको छ । अन्य स्थानीय तहमध्ये चौरपाटी ७१.७५, साँफेबगर नगरपालिका ७१.५०, बान्नीगढी जयगढ ७१, मंगलसेन ६८.७५, तुर्माखाँद ६६.२५, रामारोशन ६५.७५, कमलबजार नगरपालिका ६५.२५ र मेल्लेख गाउँपालिका ४५ अङ्कमा छन् ।

डडेल्धुरामा अजयमेरु गाउँपालिका ८३.२५ अङ्कसहित पहिलो बनेको छ भने नवदुर्गा गाउँपालिका ७३.२५ अङ्कमा पुछारमा छ । आलिताल र भागेश्वर ८१.२५, गन्यापधुरा ७५.५०, परशुराम नगरपालिका ७५.२५ र अमरगढी नगरपालिका ७३.७५ अङ्कमा छन् ।

डोटीमा जोरायल गाउँपालिका ८२.२५ अङ्कसहित पहिलो बनेको छ भने पुर्विचौकी गाउँपालिका ५८.७५ अङ्कमा पुछारमा छ । यसै जिल्लामा बडीकेदार ८१.२५, बोगटान ८१, आदर्श ७९.७५, दिपायल सिलगढी नगरपालिका ७८.७५, शिखर नगरपालिका ६८.५०, सायल ६८.२५ र केआईसि ६७.७५ अङ्कमा छन् ।

दार्चुलामा शैल्यशिखर नगरपालिका ८१ अङ्कसहित पहिलो बनेको छ भने लेकम गाउँपालिका ६१.७५ अङ्कमा पुछारमा छ । अन्य तहमा मालिकार्जुन ८०.७५, नौगाडी ८०.२५, दुहुँ ७९.२५, अपिहिमाल ७८.७५, महाकाली नगरपालिका ७८.७५, मार्मा ७२ र ब्याँस गाउँपालिका ७०.२५ अङ्कमा छन् ।

बझाङमा केदारस्युँ गाउँपालिका ७९.७५ अङ्कसहित पहिलो र सुर्मा गाउँपालिका ६२ अङ्कसहित पुछारमा छ । मष्टा गाउँपालिका ७६.७५, जयपृथ्वी नगरपालिका ७२.२५, थलारा गाउँपालिका ७१.५०, बित्थडचिर ७०, खप्तडछान्ना ६८.७५, तालकोट ६७.५०, छबिस पाथिभरा ६७.२५, दुर्गाथली ६४ र बुंगल नगरपालिका ५७.५० अङ्कमा छन् ।

मन्त्रालयका अनुसार कार्य प्रक्रिया, उपलब्धि, शासन प्रणाली र विकास व्यवस्थापनमा गर्नुपर्ने सुधारका क्षेत्र पहिचान गर्ने, आवधिक समीक्षाको आधार तय गर्ने र स्थानीय सरकारबीच स्वस्थ प्रतिस्पर्धा गराउने उद्देश्यले लिजा मूल्याङ्कन गरिएको हो । मूल्याङ्कन शासकीय प्रबन्ध, संगठन तथा प्रशासन, बजेट तथा योजना व्यवस्थापन, आर्थिक/वित्तीय व्यवस्थापन, सेवा प्रवाह, न्यायिक कार्यसम्पादन, भौतिक पूर्वाधार, वातावरण संरक्षण तथा विपद् व्यवस्थापन, सहकार्य र समन्वयलगायत १० सूचकमा गरिएको छ ।