डडेल्धुरा । नेपाल महिला सङ्घ डडेल्धुराले तीजको अवसरमा शुभकामना आदानप्रदान तथा तीज विशेष कार्यक्रम आयोजना गरेको छ। कार्यक्रम डडेल्धुरा निर्माण व्यवसायी सङ्घको सभा हलमा सम्पन्न भएको हो।

कार्यक्रमका प्रमुख अतिथि नेपाली कांग्रेसका पूर्वसभापति रघुबर भट्ट रहेका थिए भने विशिष्ट अतिथिका रूपमा सुदूरपश्चिम प्रदेश सरकारकी सामाजिक विकास राज्यमन्त्री सरस्वती खड्का उपस्थित थिइन्।

कार्यक्रममा बोल्दै राज्यमन्त्री खड्काले महिलाको शक्ति र क्षमताबिना समाजको समग्र विकास सम्भव नहुने उल्लेख गर्दै तीज पर्वले महिलालाई एकताको सूत्रमा बाँध्ने महत्त्वपूर्ण अवसर प्रदान गर्ने बताइन्। उनले भनिन्, 'तीज केवल नाचगान गर्ने चाड मात्र होइन, यसले महिलाको अधिकार, समानता र सशक्तीकरणबारे चेतना जगाउने अवसर पनि हो। महिला सचेत र सशक्त भए मात्रै समाज र देश बलियो हुन्छ।'

त्यस्तै, उनले महिला सङ्घको सक्रियतामार्फत डडेल्धुरामा महिला नेतृत्व र सामाजिक योगदान थप सशक्त बन्दै गएकोमा प्रसंसा व्यक्त गरिन्।