डडेलधुरा । गृह मन्त्रालयले सुदूरपश्चिम प्रदेशमा छ वटा नयाँ इलाका प्रशासन कार्यालय खोल्ने तयारी गरेको छ । दरबन्दी नबढाई विद्यमान स्रोत र जनशक्ति प्रयोग गर्ने योजनाअनुसार देशभर २३ वटा इलाका प्रशासन कार्यालय स्थापना गर्ने तयारी भइरहेको छ, जसमा सुदूरपश्चिमका छ कार्यालय पर्छन् ।

गृह मन्त्रालयका अनुसार नयाँ कार्यालय बाजुराको कोल्टी, बझाङको देउरा, अछामको साफेबगर, डोटीको विपिनगर, दार्चुलाको गोकुलेश्वर र बैतडीको मेलौलीमा स्थापना गरिनेछ ।

ग्रामीण भेगमा रहेका नागरिकलाई प्रशासनिक सेवा सहज र नजिकै उपलब्ध गराउने उद्देश्यले मन्त्रालयले नयाँ इलाका प्रशासन कार्यालय स्थापना गर्ने प्रस्ताव मन्त्रिपरिषदमा पेश गरेको हो । सोमबार बसेको मन्त्रिपरिषद बैठकले उक्त प्रस्ताव स्वीकृत गर्दै यसलाई मन्त्रिपरिषदको प्रशासन समितिमा पठाएको छ ।

दरबन्दी वृद्धि नगरी विद्यमान स्रोतको अधिकतम उपयोग, स्थानगत आवश्यकता र स्थानीय तहसँगको समन्वयमा सेवा प्रवाहलाई प्रभावकारी बनाउने गृह मन्त्रालयको योजना छ । नागरिकता, राहदानी, राष्ट्रिय परिचयपत्र, विपद् व्यवस्थापन, सार्वजनिक सुरक्षा लगायतका सेवा स्थानीय तहसम्म पु¥याउन इलाका प्रशासन कार्यालय अपरिहार्य हुने ठहर गरिएको छ ।