काठमाडौं । आकर्षक तलबमा रोजगारी दिलाइदिने प्रलोभन देखाउँदै क्यानडा पठाउने भन्दै ठगी गरेको आरोपमा एक युवकलाई प्रहरीले पक्राउ गरेको छ।

पक्राउ पर्नेमा डडेल्धुराको भागेश्वर गाउँपालिका–५ घर भई हाल काठमाडौं नयाँबानेश्वर बस्ने २४ वर्षीय सुरेश नाथ रहेका छन्। उनले दुई जनाबाट क्यानडा पठाइदिन्छु भनी झुक्याएर १७ लाख एक हजार रुपैयाँ उठाएको उपत्यका अपराध अनुसन्धान कार्यालयले जनाएको छ।

नाथले लामो समयसम्म पीडितहरूलाई विदेश लैजाने आश्वासन दिँदै ढिलाइ मात्र गर्दै आएका थिए। तर अन्ततः सम्पर्कविहीन भएपछि पीडितहरूले प्रहरीमा गुहार गरेका थिए। त्यसपछि प्रहरी टोलीले उनलाई नयाँ बसपार्कबाट पक्राउ गरेको हो।

हाल सुरेशलाई थप अनुसन्धान र कानुनी कारबाहीका लागि वैदेशिक रोजगार विभाग, ताहाचलमा बुझाइएको प्रहरीले जानकारी दिएको छ।