डडेल्धुरा । डडेल्धुराका तीन स्थानीय तहमा नयाँ प्रमुख प्रशासकीय अधिकृत तोकिएका छन्। संघीय मामिला तथा सामान्य प्रशासन मन्त्रालयले बिहीबार एकैपटक १२२ जना उपसचिव र ९७ जना शाखा अधिकृतको सरुवा गर्दै नयाँ हाकिम तोकेको हो।

यसअनुसार सदरमुकाम अमरगढी नगरपालिकामा उपसचिव नवराज ओझा खटाइएका छन्। ओझा यसअघि सुदूरपश्चिम प्रदेश मुख्यमन्त्री तथा मन्त्रिपरिषद्को कार्यालयमा कार्यरत थिए। उनको स्थानमा कार्यरत लक्ष्मीप्रसाद उपाध्यायको सरुवा गरिएको हो।

यस्तै, परशुराम नगरपालिकामा लुम्बिनी प्रदेश मुख्यमन्त्री तथा मन्त्रिपरिषद्को कार्यालयमा कार्यरत उपसचिव मोहन अर्याल पठाइएका छन्। यसअघि परशुराम नगरपालिकामा कल्पना भट्ट प्रमुख प्रशासकीय अधिकृतका रूपमा जिम्मेवारी सम्हाल्दै आएकी थिइन्।

त्यसैगरी, आलिताल गाउँपालिकामा उद्योग, वाणिज्य तथा आपूर्ति मन्त्रालयमा कार्यरत शाखा अधिकृत दीपेन्द्रराज अधिकारीलाई खटाइएको छ। हालैको सरुवामा आलितालका तत्कालीन प्रमुख प्रशासकीय अधिकृत नरेन्द्रसिंह ठगुन्नाको स्थानमा अधिकारीलाई पठाइएको हो।