डडेल्धुरा।  डडेल्धुराको नवदुर्गा गाउँपालिका–५ चौडमा बिहीबार बिहान भएको जीप दुर्घटनामा मृत्यु हुनेको संख्या पाँच पुगेको छ।

दुर्घटनामा परेर गम्भीर घाइते भएका ४२ वर्षीय गणेशबहादुर साउँदको उपचारकै क्रममा मृत्यु भएपछि मृतक संख्या पाँच पुगेको जिल्ला प्रहरी कार्यालय डडेल्धुराले जनाएको छ। उनलाई डडेल्धुरा अस्पतालबाट थप उपचारका लागि धनगढीस्थित माया मेट्रो अस्पताल लगिएको थियो। तर, उपचारकै क्रममा उनको निधन भएको परिवार स्रोतले पुष्टि गरेको छ।

यसअघि दुर्घटनास्थलमै चारजनाको ज्यान गएको थियो। घटनास्थलमै मृत्यु हुनेमा नवदुर्गा–५ का १८ वर्षीय सुरेश साउँद, २३ वर्षीय सुरेश पार्की, ४० वर्षीया तारा अवस्थी र ७२ वर्षीया कलावती साउँद रहेका छन्।

दुर्घटनामा घाइते भएका अन्य तीनजनाको माया मेट्रो अस्पतालमा उपचार भइरहेको छ भने जिप चालक रामबहादुर साउँदलाई थप उपचारका लागि भारत लगिएको बताइएको छ। त्यस्तै, सात वर्षीया सुस्मिता पार्कीको डडेल्धुरा अस्पतालमै उपचार भइरहेको प्रहरी निरीक्षक तथा सूचना अधिकारी डम्बर विष्टले जानकारी दिएका छन्।