डडेल्धुरा । अविरल वर्षासँगै निरन्तर पहिरो खसिरहेको डडेल्धुरा–डोटी जोड्ने केआई सिंह राजमार्गमा रातिको समयमा सवारी सञ्चालन रोक लगाइएको छ।
गन्यापधुरा गाउँपालिका–२ रडुवा खोलानजिक लगातार पहिरो खसिरहेकाले अर्को सूचना नआएसम्म बेलुकी ७ बजेदेखि बिहान ५:३० बजेसम्मका लागि यात्रा रोकिएको जिल्ला प्रशासन कार्यालय, डडेल्धुराले आइतबार जारी गरेको सूचनामा उल्लेख छ।
प्रशासनले सर्वसाधारण यात्रु, चालक तथा सरोकारवाला निकायलाई उच्च सतर्क रहन आग्रह गरेको छ।
जल तथा मौसम विज्ञान विभागले सुदूरपश्चिमका विभिन्न भूभागमा मध्यमदेखि भारी वर्षा हुने सम्भावना रहेको जनाउँदै नदी/खोलाको सतह बढ्ने र पहिरोको जोखिम बढ्ने चेतावनी दिएको छ।
सहायक प्रमुख जिल्ला अधिकारी सावित्रा पुनले जारी गरेको सूचनामा तटीय तथा भिरालो क्षेत्रमा बसोबास गर्ने नागरिकलाई सुरक्षित रहन र अत्यावश्यक बाहेक अन्य समयमा यात्रा नगर्न अनुरोध गरिएको छ।
